خناقة بكوكب الألوان… ومن كان المنتصر !!

خناقة كوكب الألوان… ومن كان المنتصر !!

الزمان : قبل 10 سنين ضوئية ..

الــ: Location بين كوكب الأرض وكوكب الألوان..

المشهد الأول: هجرة قوس الألوان من كوكب الأرض بعد شجار أفقدها بريقها وزهوتها

نهاري/ خارجي : وسيم في الحديقة عم يلون بدفتر الرسم تبعولو ..

الشمس صفرا.. والسما زرقا.. والشجرة خضرا مع انو فصل الشتاء , هيك قالت المعلمة وبس

المخرج: خمسة أربعة تلاتة تنين ..هدوء .. أكشن

وسيم :  عم يلون الشمس بس الأصفر ما عم يلون .. يمكن لازم إبريه .. يلا رح جرب الأحمر ..

مممممممم غريب .. كمان ما عم يلون … طيب الأخضر .. نفس الشي .. يوه شوفي

كل الألوان ما عم تلون .. شو عم يصير ؟؟

تطلع وسيم من الشباك .. شاف قوس الألوان عم يمشي بسرعة .. هربان من الأرض

وطالع للسما متل النار .. كـأنو في حدا عم يلحقو .. فكر انو في شي لعبة طميمة أو دقة عيش وما توقع غير هيك بس حس انو في إنّ

ما مرق 3 دقايق إلا وصارت كل الدنيا بلا ألوان … كنزتو .. لعبتو .. الحيطان .. الشوارع ..

الإعلانات .. السيارات .. السما .. الجوري .. البحر .. صار العالم colourless

شو في يا جماااااااااااااااعة حتى جلدو وعيونو الخضر  صارو بلا ألوان

.

.

المشهد الثاني: ليلي خارجي على كوكب الألوان

الأزرق … أنا أجمل الألوان .. السماء زرقاء .. في أكبر من السما ؟؟.. البحر أزرق

في أحلى من البحر ..؟؟ المي زرقا حدا بيحسن يعيش بدون مي

الأبيض: لأ يا عمري السماء والبحر والمي مو زرق

الأزرق: خراس انت ما بتعرف .. هاد الي ناقص .. الأبيض يحكي .. ريتون يقمعوك يا ابن الـ ..

الأحمر مقاطعاً : شو خراس ما خراس .. شو وين مفكر حالك .. عيوني .. إذا حكى الأحمر

الكل بسكر تمو .. الأحمر هو الأجمل والأكمل

الأحمر هو لون الحب .. ولون الحرب .. ولون الدم .. ولون الورد ولون الخجل ولون الغضب ..أنا أنا أنا أنا .. أنا الأحمر

الأزرق: سكوت ولا قلتلك الأزرق يعني الأزرق

احتدم الأزرق والأحمر .. احتدام شديد.. شد شعر ولكمات وضرب عالوجه مع انو ممنوع

طلع شوية غبرة  .. وبلش العياط  واجتمعت كل الألوان عم تتفرج على الخناقة .. وما لقينا إلا الأحمر والأزرق فاتو ببعض وقتلو بعض  وطلع منون الأخضر ..

الأخضر : ( بصوت كبريائي عنجهي ) أنا أجمل الألوان  الشجر أخضر .. النباتات خضراء .. الباصات خضرا .. والفيلفلة والنعنع والبقدونس والكزبرة كلشييييييييي أحضر

ما كمل الأخضر كم كلمة حتى اجتمعت كل الألوان ( باستثناء الأحمر والأزرق )

وكل واحد صار يقول أنا أحلى .. لأ أنا أجمل .. لأ أنا الأكبر .. وفاتت الألوان ببعضها وبلش الخبط

والسفق والرقع ما عاد انعرف السيرقوني من البنفتحي

.

.

المشهد التالت الأخير:

داخلي خارجي نهاري ليلي:

جاء ملك الألوان .. ليفض النزاع .. الأسود ومعه عصا كبيرة ..

العقوبة ..سلب كل لون لونه لمدة عشر سنوات

ضرب العصاية بالكوكب ضربة كبيرة

الكل سكت .. إجا المعلم .. قيام .. ما بدي اسمع صوت

الأسود : جيبولي قوس الألوان حالاً .. وين هالأزعر .. تاركون تتخانقو وعم يصيع هون وهون أكيد هلأ بكون عم لطش شي غيمة

قوس الألوان: مسرعاُ من الأرض إلى كوكب الألوان وعم يبكي من خوفه

الأسود كان كتير مبسوط … ضربو سبع ضربات .. قام سلتو منو ألوانو السبعة

كل الألوان صارت بلا ألوان ..

كل شي بالكون كان مسافر من كوكب الألوان رجع عالكوكب تبعو

صار في هجرة لونية كونية ..

وحل السواد محل كل الألوان

وصارت السما.. البحر..الورد.. الشوارع.. الأشجار.. وكل شي أسود .. تحول كلشي للسواد

الأسود طبعاً ما بيعرف الرحمة وكان ناطر هاد اليوم من زمان ..

أكيد عرفتو مين الأسود ؟؟؟

.

.

جرعة زائدة : خلينا نحنا والألوان على ابن عمنا … ونحنا وابن عمنا عالأسود

وإلا رح تصير حياتنا بلا ألوان متل ما عم تصير هلأ

ما في لون أحلى من لون … والدنيا ما بتحلى إلا إذا اجتمعت كل الألوان.. وأي غياب لأي لون رح يخلي اللوحة ناقصة

21/10/2009


مواضيع ذات صلة:

على باب الكنيسة .. يصلي

متحدين تحت ألوان علمهم ..أكثر من خمسين مدوناً سورياً يوجهون “رسالة مفتوحة لأجل سورية”

ليش عم تبكي يا وطن !… لك آخ يا وطن.. آخ يا وطن ..

جرعة زائدة على الفيسبوك ..


Advertisements

9 responses to “خناقة بكوكب الألوان… ومن كان المنتصر !!

  1. مزبوط مافي لون أحلى من لون .. ولا في حدا أحسن من حدا

    بلا لوني .. وبلا لونك .. في شي رح يكون ناقص

    حلو كتير

    تدوينة كتير شفافة 🙂

  2. ماهر : ما زال الابداع ينهمر من حبر قلمك يا اخي , تشبيه اروع ما يكون لصورة متكاملة للحياة والاشخاص , وبالتأكيد الاجزاء تكمل بعضها البعض في كل شيء جميل ولا يمكن عزل إحداها على الاخرة
    دمت بفرح عزيزي 🙂

  3. تدوينة شفافة كتير (على قولة صديقتي فتوشة)

    وبالفعل لون جديد طلع معك هالمره يا ماهر..غير كل الالوان يلي عودتنا نشوفها هون..

    كانت جرعة زائدة..ولكنها جرعة ملونة وخفيفة..وحلوة كتيييير كتيييير

    بعدين طالما إهداء الى (نور شلتنا)…ف مافي حكي بنوووووب..

    بالتوفيق صديقي..وناطرين جرعاتك الزائدة على طول..:)

  4. شكرا ماهر كتير على هتدوينة عنجد بهنيك على أسلوبك القصصي الله لا يحرمنا ولا لون بحياتنا لأنو الحياة بلا ألوان مو حياة أصلا نحنا بحاجة لكل الألوان وحتى للأسود يلي هو لون الحزن والسكون لنحس بالنعمة الكبيرة يلي نحنا عايشين فيها ونشكر ونحمد الله دائما على جعل حياتنا فسحة ألوان بالوقت يلي في كتير ناس مقتصرة حياتن على لون أو لونين …
    بالتوفيق وخلي حياتك كلا ألوان

  5. شكرا فتوشة
    أنت واسمك وتدويناتك ومدوناتك وشكلك ومضمونك
    كلك ألوان وكلك ذوق

    أبو حميد الورد
    اخترت علق اليوم لأنو كان عيد ميلادك
    كل عام وحياتك كلها ألوان زاهية

    دنيا:
    انتظري التدوينة يلي بدها تحكي عنك
    يعني صار دورك بعد فرح ولميس ونور
    شكرا على مرورك الشفاف كمان

    نور:
    شكرا كتير
    هي حققتلك أمنيتك بتدوينة باللهجة العامية
    والله يقدرني حققلك كل يلي بتطلبي مني

    شكرا لكم أصدقائي
    حلاوة هي التدوينة كانت أهلية بمحلية
    كلو من أهل الدار
    حتى فتوشة
    خريجة من القسم
    يعني منا وفينا
    أهلا وسهلا فيكن
    شرررفتو

  6. خلينا نحنا والألوان على ابن عمنا … ونحنا وابن عمنا عالأسود

    وإلا رح تصير حياتنا بلا ألوان متل ما عم تصير هلأ”

    🙂 تدوينة جميلة أعادتني لشفافية حكايات الأطفال

    تحيتي

  7. شكرا لك ديما
    دائما براءة الأطفال على رغم شفافيتها إلا أنها مفعمة بالألوان
    على غرار كلماتك التي لا أعرف مصدرها لكنني جداً سررت بها

  8. رائع رائع

    أسلوب رائع
    مضمون رائع
    سرد رائع

    طريقة ملونة لطرح الإبداع

    تدهشني كتاباتك

    سلمت يداك أيها الماهر
    تحياتي

  9. زهرة الجوري .. تخلين دائما ما سكن من حروفي
    أشكرك جدا من كل قلبي
    لأجلك ولأجل عيون مثلك
    تقراً وتشعر
    كما تقرأين وتشعرين
    سأبقى أكتب
    شكرررررررررررا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s