خيم في كلية الآداب!! .. ليست مسرحية تنكرية

بكل أسف .. أحب أن أوضح من بداية التدوينة أنني لا أمزح .. وأن ما ستقرؤونه هو بالفعل يحدث في أقدم عاصمة مأهولة في التاريخ .. في القرن الواحد والعشرين .. في جامعة تصف نفسها بالعريقة !! على أبواب السنة الجديدة   2010

هدية السنة الجديدة.. بعد العودة للحطب لغلاء المازوت .. والشمعة لانقطاع الكهرباء.. الخيم بدل القاعات لطلاب الجامعات

عندما تقدمت لجامعة دمشق . . . طلبوا مني صورة شخصية .. وصورة عن الهوية وشهادة البكالوريا  .. طوابع .. ورقة من شعبة التجنيد ……..ألخ (مسلسل مكسيكي منحكي عنو بعدين )

ولكن لم أكن أدري أنه يتوجب علي إحضارة شهادة سباحة وغوص  في بحيرات الجامعة التي تمتلىء في موسم الأمطار.. وأخرى للإسعافات الأولية نظراً للظروف التي قد تعتضرتك في جامعة” لا تعترف بكلمة مستحيل “!!

كل شيء ممكن الحدوث في جامعة دمشق .. كل شيء نعم كل شيء .. ومن قال لك أنك في جامعة دمشق وبلحظة واحدة تعود 1000 سنة للوراء !!

لم أكن أصدق حتى رأيت بأم العين ..

خيم تنصب قبالة مبنى قسم الصحافة في جامعة دمشق كلية الآداب  ليقدموا بها الطلاب امتحاناتهم بحجة عدم توفر أماكن كافية….

ولكن هذه النتيجة الطبيعية للخطوة غير المدروسة من الخطوات الكثيرة التي عودتنا عليها عمادة كلية الآداب والتي كانت هد الهنكارات قبل تأمين البديل..

الطلاب سيقدمون امتحاناتهم في الخيم …يا للعجب ..

“يا للمهزلة” كانت أولى الكلمات التي انسابت بتلقائية على شفاهي.. والصدمة ما زالت تستحوذ على حواسي الست

كل الظن أن المجتمعات والجامعات تتقدم يوماً بعد يوم .. محاولةَ إدخال التقنية والتكنلوجيا إلى الجامعات

كان سقف مطالبنا دوماً : مايكريفون يعمل  ولوح نظيف .. ووالله لم نطلب أكثر من ذلك ..  الآن للأسف صار ذلك حلماً

بالله عليكم .. نحن في فصل الشتاء .. والسماء جادت علينا بخيوط ماء منهمرة

ماذا لو بسط الله أيادي السماء ونحن نقدم امتحاناتنا في الخيم ؟؟

كيف سيعالج القائمون التسرب والتنقيط الحتمي من القماش ؟؟

هل على الطالب أن يحمل بيمناه القلم .. والشمسية بيسراه ؟؟؟

ماذا عن البرد في عز دين كانون الأول  وفي منطقة المزة المعروفة بنسيمها البارد…

ماذا عن الهواء الذي سيعصف بأطراف الخيمة ؟؟

هل على الطالب أن يأتي مدججاً بالكفوف الصوفية والجاكيت السميك لأن بيت الشعر لا يدرأ برد الشتاء؟؟

موقع السيريا نيوز ينصح كل من الطلاب و المراقبين بتناول حبوب الأسبرين و فيتامين C لاتقاء حالات الرشح و الانفلونزا المرجح إصابتهم بها.

جريدة الوطن نقلت على لسان وائل معلا رئيس جامعة دمشق :

هذا الإجراء بأنه لمصلحة الطلاب المستنفدين لفرص الرسوب الذين سمح لهم بموجب المرسوم  التقدم للامتحان خلال الدورتين الامتحانيتين القادمتين 2009-2010 حيث تجاوز عددهم عشرين ألف طالب في جامعة دمشق، لافتاً إلى أن هذا العدد الكبير لم تتوقعه الجامعة وأنه ليس بمقدورها تأمين قاعات امتحانية لهم ضمن كليات الجامعة التي تكتظ بالطلاب فترة الامتحانات ما اضطر الجامعة لاتخاذ هذه الخطوة.

آخرون ينصحون الطلاب أن يرتدوا جزمات طويلة مطاطية مقاومة للسيول المحتملة والبحيرات التي اشتهرت بها أرض كلية الآداب المليئة بالحفر ..

وإذا كانت هنالك مدافئ … ما الذي يضمن لا سمح الله حريق بأحد أطراف الخيمة الذي سيلتهم خلال لحظات المكان بأسره؟؟

ماذا لو هبت نسمة من نسمات الوادي .. وطيرت الأوراق الامتحانية بما حملت ؟؟

ماذا سيحمل الطالب ليحمل .. عبء الامتحان أم رعب المراقبين .. أم برد قارس .. أم خوف على حياته من حريق محتمل خاصة أن الإجراءات الوقائية عادة اعتاد على نسيانها القائمون على العمل ؟؟

بشرى سارة للمراقبين


.. الغش والنقل أصبح شبه مستحيل فصوت المطر والريح سيكون أعلى من صوت أي طالب يحاول مساعدة صديقه في هذه الظروف العصيبة !!

اليوم على الطالب أن يأتي على فرس أبيض .. ولا مانع من ارتداء الكلابية_مشان البريستيج _ …

ولملء الوقت بين المحاضرات بإمكان الطلاب إحضار عدد من رؤوس الغنم لكي يمارسوا مهنة أجدادنا في جزيرة العرب

علماً أن المراقبين سوف يكونون في على باب القبيلة… أقصد الكلية مستقبلين طلابهم الكرام بالقهوة المرة

( أقل منها يعني .. شو نسيت انو الكرم من شيم العرب )

ولا داعي للتفتيش عن الموبايلات وأجهزة التسجيل .. لأن المطر المنهمر عليها كفيل بتعطيلها …

ولكن هذه النتيجة الطبيعية للخطوة غير المدروسة من عمادة كلية الآداب والتي كانت هد الهنكارات قبل تأمين البديل..

وأخيراً أضع بين يديكم السؤال الذي طرحه أحد المواقع الالكترونية
((لم تستطع عمادة كلية الآداب إيجاد قاعات امتحانية في الكليات المجاورة؟ فهناك قاعات في كليات الطب البشري و الأسنان و الصيدلة، كما أن كليات هندسة العمارة و العلوم و الاقتصاد و الفنون ليست بعيدة عن كلية الأداب. مع العلم أن عدداً كبيراً من طلاب الحقوق كانوا يقدمون امتحاناتهم في هنغارات كلية الأداب سابقاً. فما المشكلة الأن؟ أم أن كرامة طلاب كلية الآداب و حقوقهم باتت في الحضيض؟

و إذا أخذنا بعين الاعتبار كلاً من الطلاب و المراقبين، فلا يسعنا القول إلا أن هذه الظروف غير الإنسانية لم تشاهد في أي جامعة عريقة في العالم. بل إن أسرى الحرب و المشردين قد يحصلون على خدمة أفضل. ))

جرعة زائدة:

كم هي عزيرة علي .. بلى .. وأنا مدين لها بالكثير ..

ولكن عذراً يا جامعة دمشق .. أنا لا أكلم جدرانك وعلومك .. ولا أقصد أشجارك وترابك

إنما عنيت القائمين عليك .. ومن تصدى لمسؤولية إدارتك ؟؟

فإليه السؤال بحرقة قلب !

Advertisements

22 responses to “خيم في كلية الآداب!! .. ليست مسرحية تنكرية

  1. عنجد انا بأسف على هيك جامعه هي مو جامعه هي زريبه اشرف منها معلش يعني وصلت معن لدرجه انه نقدم الفحص بخيم بالطريق معلش يعني بس معقول ماعرفوا يجهزوا كم بناء لنقدم فيه بس عوجا والله اخرتها وخيمه العالم كلها لقدام الا نحن لقبل الوراء حتى

  2. بالفعل مهزلة يا صديقي العزيز
    وأيها من مهزلة
    الله يكون بعوناأحسن شي
    ولاحول وقوة إلا بالله على هيك كلية

  3. طولو بالكم يا شباب
    يعني متل ما قلت البدو من طول عمرهم عايشين بالخيم
    وما حدا مات
    يعني اطمنو ما رح تموتو

    بس عنجد عيب على جامعة الها اسم مثل جامعة دمشق تعمل هيك

  4. طولوا بالكم يا جماعة تطلعوا للموضوع من الناحية الايجابية ………لك رح يحطونا بغينيس للارقام القياسية و هيك منطلع من الكلية للعالمية

  5. يا شباب شوفوا الجانب الايجابي …..رح ندخل موسوعة غينيس للارقام القياسية بس يشوفونا العالم ونحن عم نقدم فحص فوق بعضنا. ولووووو

  6. عادي ماهر كل شي عادي بجامعتنا.خلينا ننظر للامور نظرة ايجابية.بركي القائمين على الموضوع او حتى عميد الكلية نفسه قرأ كتير عن مدينة اسبرطة ونظامها وتأثربها لدرجة انو حاول التقليد.فما كان الا تقليد احمق او اعمى.اما نحن الطلاب للاسف فئران تجارب ونحن اخر شىء يتم التفكير فيه في جامعة من المفترض ان نكون نحن اساسها و عمادها .

  7. السلام عليكم
    أخي العزيز
    لأول مرة أتشرف بزيارة مدونتك ………….و لن تكون هذه الزيارة الأخيرة بحول الله
    أما بخصوص الجامعات العربية عموما ………فعلى الطالب أن يتسلح بالصبر ليس فقط لتحصيل المادة العلمية بل ………………في معايشة مثل هذه الظروف الكارثية لأنه ببساطة ليس لدينا إمكانيات كتلك الموجودة في الجامعات البريطانية و الأمريكية……………فصبرا يا أخي فلأزمات تنجب الهمم

  8. أهلا وسهلا أخي يوسف
    شرفت بمرورك
    أنا عادة أرد على الجميع في آخر التدوينة .. بعد يومين أو ثلاثة أيام
    لكن كونك ضيف جديد
    فواجب الضيافة ألزمني أن أرد مباشرة
    شكرا لمرورك الذي أسعدني

    أصدقائي الباقين .. لي عودة

  9. لا تزعل يا ماهر على المعلومات لرح تكون حافظا ورح تنساها من البرد بس كمان المراقبين رح يتلجوا من
    البرد وهاد شي حلو كتير وفي شغلة حلوة كمان هي انو نحنا اول العالم رح نقدم فحص بهالشكل
    فأحسن شي انو ناخد الامور ببساطة ورياحة بال وكل شي من الله يا محلاه

  10. غالبا انت بتعرف شو رأيي بالموضوع:
    صديقي لازم دائما تنحط بأصعب المواقف والحكمة من هالشي معروفة , يعني عمادة الكلية الموقرة (وبالمناسبة عمادة اللكلية جديدة إستلمت مهامها من شهرين )تريد أن تضع الطالب تحت أصعب الظروف كي ترى نسبة إنتاجه فمن ينتج وقت الأزمات لا بد أنه سيبدع في الايام العادية وهذا ما تبتغيه عمادتنا الموقرة …
    معلومات على الهامش:
    1-في السنة الاولى إنتظرنا دورنا لندخل إلى إمتحان مادة الإحصاء عملي حوالي 6 ساعات وغالبكم يذكر هالشي(6 ساعات بإنتظاار دورنا عالإمتحان الله يرحم ايام طوابير الخبز )
    2- حضرنا إلى الكلية على مدى 3 ايام وكل يوم 3 ساعات إنتظار على أمل مناقشة حلقة البحث يعني 9 ساعات إنتظار ليتكرم السيد الدكتور ويعطينا علامات اقل من عدد الساعات التي إنتظرناها

    هلئ صار فينا نعرف يمكن ليش ما في إسم ولاجامعة عربية (بإستثناء واحدة وترتيبها بعد ال400)من الجامعات الخمسمائة الاولى على العالم ………
    موضوع حلو ماهر يعطيك الف عافية

  11. فعلا شر البلية ما يضحك

    لك ونحنا قرب كلية التربية عم يعملوا عنا هدول الخيمات وأنا كنت عم اسأل حالي لشو :d

    اي ميزتنا انو اختراعاتنا مو طبيعية بالمرة

    تحياتي ماهر

  12. طيب أمنا وصدقنا انو القرار من شان طلاب المرسوم
    طيب انا طالب سنة رابعة نظامي و مالي مستنفذ و مالي راسب بأي سنة حتى شو ذنبي قدم امتحاناتي بالخيمة يللي اكيد رح تأثر على ادائي الامتحاني

  13. بعض التعليقات في السيريانيوز على المقالة

    2009-12-27 12:40:21

    واحد من الركب الاخير للحضارة
    تفظلو يا هلا بالربع تفظلو
    ياهلا بيكم بمظاربنا… صب قهوة ياول… تامر ياشيخ… (ولا يشربون القهوة ويضعون الفناجين على الارض ويقولون طالبينك ياشيخ) فيرد اشربو فهوتكم وطلبكم ما ينرد
    سوريا

    2009-12-27 12:21:50

    بدوي
    عرفت ليش
    من كم يوم شفت مكتوب على كليتكم (مضارب بني اداب ) وبعد شفت بطيحان قاعد يتتن مع الرعيان والمرابعين مشرق شق الحريم
    سوريا

    2009-12-27 11:58:33

    همكي
    مسموح التدخين؟؟
    بماان خيمة عم يلعب فيها الهوا لعب لأنو والله الواحد بيخرم كتير بالفحص نيالكون ياطلاب الاداب عم تقدمو الفحوص متل السيران
    سوريا

    2009-12-27 01:40:26

    طالبة
    انصدمت من هل المنظر
    اليوم انزلت وانصدمت بهاد المنظر ما كنت اعرف اول شي هل الخيم ليش يلا بركي مننجح على السئاعي والبرد وانشالله الفصل الجاية بتكون الأبنية الجديدة خلصت وبتنفك هل الأزمة فصل وبعدي
    سوريا

    2009-12-26 22:49:19

    طالب كسول
    للأسف أنا بالمدرج 4
    أصلا التغير واجب ومن شان هيك غيروا وحطولنا خيم بركي على هالخيم بننجح أكيد عملوهيك لأنو شافوا إنو بالمدرجات والقاعات ماحدا عم ينجح..
    سوريا

    2009-12-26 22:41:09

    خريج سابق
    اؤيد لولوة
    الحقيقة ان المصائب كبيرة ولا أمل ان يستجيب احد فلا بأس ان يأخذ احدهم الموضوع بشيء من المزح والا تريد ان يصاب الجميع بجلطات قلبية ياسيد مشارك
    سوريا

    2009-12-26 20:16:59

    ماهر تاني
    ما بعرف ليش ؟
    ما بعرف ليش حاسك مزعوج كتير من شغلة عدم القدرة على النقل من ظميلك ويبدو لي انه السبب الوحيد وراء كتابتك لمساهمتك ..انا طالب متلي متلك وكتير شايف الموضوع طبيعي وخاصة انه ظرف طارئ يعني في عشرين الف طالب مستنفذ فطبيعي جدا ..وكتير فرحت لما شفت ان امكانية الغش مستحيلة لانه حان لطالبنا ان ينجح بعرق جبينه لا بعرق جبين غيره
    سوريا

    2009-12-26 19:40:00

    iman
    باركولي ! طلعت بخيمة رقم 9
    صرلي اسبوع مريضة من الخبر..جامعة دمشق ولنا الفخر !! مارح قول اكتر من هيك
    سوريا

    imannaaj@hotmail.com

    2009-12-26 16:45:35

    طالبة
    مهزلة
    اول ما شفت الخيم عم تنصب فكرت انو في شي معرض جامعي للكتاب بس ما تخيلت انو تكون هي الخيم للامتحانات بقول للطاب اللي امتحاناتهم بالخيم نتمنى لكم الشفاء السريع انا امتحاني بالقاعات عن جد نيالي
    سوريا

    2009-12-26 15:22:33

    لولوة
    الحضارة وقفت عندي بس
    لاني عم امزح؟ يعني لو تكلمت بجدية قصدي بعصبية كان الموضوع اختلف وكنا هلئ سبقنا العالم بالتطور والحضارة, حقك عليي يامشارك..بس واحد مابيأثر على الحضارة لذلك اعتبر هالواحد ما موجود وورجينا وين بتوقف بعدو الحضارة!!
    سوريا

    2009-12-26 14:25:15

    dede
    …..For god sake
    مسخرة ومهزلة.. مابقي غير يحطولنا بساط بالشوراع ويعطونا محاضرات او نقدم امتحانات على بساط الريح جميل ومريح.. طيب سؤال وحيد لو سمحتم بما انوالتعليم النظامي والتعليم المفتوح بيتشاركو بنفس القاعات والهنغارات وحتى الدكاترة والمحاضرين والتعليم النظامي مابيتاخد منهم هالرسوم العظيمة اللي ممكن تغطي نفقة اي تحديثات.. طيب رسوم التسجيل ورسوم المواد اللي عم يحطوها آلاف الطلاب من التعليم المفتوح والموازي وين عم يروحو؟؟؟؟؟
    سوريا

    2009-12-26 14:28:14

    مشارك
    كل يغني على ليلاه
    الوضع مزري بالنسبة للطلاب..والمعاناة مستمرة .. وطالب يشكي علا وعسى من مجيب..اما المدعوة لؤلؤة فهي في مزاج من النكات وخفة الدم… وتقولون لي لماذا نحن في الركب الاخير من الحضارة؟
    سوريا

    2009-12-26 14:28:23

    heval
    واااااااااااه معتصمااااااااااااااااااااااه
    مرحبا بالكل قلتكم اذا استغثنا بالمعتصم بيجي انا طلعت بالخيم ور قدم فيه..شغلة.رفقاتي الاجانب كانو عم يسألو ليش الخيم مافي ابنية تكفي او غير جامعات بسورية كلها غير هوووووووووووون انا والله اشتريت كفوف صوف ويمكن اشتري جاكيت اسمك من يلي عندي 😦 بستعير شمسية جارتنا أم فيصل منيحة 🙂 لك والله مسخرة كل هالشي يلي عم بيصير شو بدو يحكي الواح تيحكي الواح والجامعة مليانة(فدان فدانة وسندان وسندانة) واحلى شي يلي مترأس عقبال مااااا خي هلا موضوع الادب الجاهلي رح يطلع شغلة مع شوية بويا الجسر100%
    زمبابوي

    shekspear_blue_eye@yahoo.com

    2009-12-25 01:03:22

    لولوة
    وين تعليقي الاول؟ رح عيدو مشان ينفهم المعنى!
    شفت هالشي بعيني,بنت اختي طلع رقمها بالخيمة,وانزعجت كتير ومشان خفف عنهاقلتلا:مو انتوا عم تدرسوا الادب الجاهلي مشان يعيشوكن الحالة نفسا,بكرا مابتلاقي غير المتنبي فتح سحاب الخيمة بكل عنفوان واباء,مستلا سيفه من غمده قائلا:الخيمة والهنكارات والمدرج يعرفني والذئب والكلب والخرفان والغنم) والتتمة تحت! اقرأوا تعليقي بالمقلوب
    سوريا

    2009-12-24 18:15:17

    لولوة
    وتابعت حديثي معها قائلة
    إذا المتنبي بذات نفسو قدم امتحان بالخيمة جايي انتي تتكبري عليها؟! يعني من شو بتشكي الخيمة؟ فاجابتني والغيظ يغلغل بداخلها: انتي مطولة هون؟؟!!

  14. والله رح أقول كلمة تلخص كل التعليقلت السابقة يلي تفضلتو حضرتكم بطرحها:

    الطالب طالب وين ماكان والكرامة محفوظة وين ماكان صاحبها*شو الإشكال إذا قدمتوا بالخيمة أو بقصر يلدز*قال لكم عميد الكليه قمنا بهدم 8 هنكارات وعدد الطلاب 45000 طالب +طلاب المرسوم الجمهوري الذين يقدرون بحوالي10000 طالب راعوا ظروف غيركم ليراعوا ظروفكم*
    يلي مااقتنع يجاوب على هالسؤال بموضوعية:
    ليش ولا واحد منكم علق على إصلاح حدائق بابل المعلقة في كلية الآداب التي صرف عليها مال قارون*أو حتى عالقليلة شكر مع أنه وأنا مابحط بزمتي ولا واحد أنه كل من تكلم أو علق على الخيم هو أو هي من مرتادي تلك الحدائق*
    حاجة حكي عالفاضي وروحوا ادرسوا أحسن ماتقولوا وقت النتائج ضربونا لأنو حطونا بالخيمة بس مابقولوا لأنو كنا عما نتفقس عالخيم ليلة للإمتحان*طالب لغة عربية أبو نذير*

  15. بهي الحق معك فيها
    تماما أخي أبو نذير
    وأنا حبيت كتير رأيك الحر
    نحنا لازم نذكر المنيح متل ما منذكر يلي مو منيح ( طبعاً من وجهة نظرنا )
    بصراحة أنا شفا نائب عميد الكلية
    وكان كلامو كتير حلو
    هو قال : انو ما رح يقدم بهالخيمة إلا الطلاب المستنفذين
    وهالوضع مؤقت
    بس هاد كمان لا يعني عدم وجود خطأ كبير
    أخي المسألة مسألة مبدأ .. هاد غير السلبيات يلي ممكن يتعرضلها الطالب بالخيمة كالبرد والمطر …الخ

    أليس الأجدر بالكلية أن قتدم حلاً أفضل
    كالذي اقترحناه أن نقدم في كلية الطب المجاورة ؟؟
    المسألة هي إشكالية تقبل وجهات النظر
    وشديد احترامي لك ولرأيك أخي الكريم
    وأحر تحياتي لكلماتك

    ماهر

  16. تعقيب: بمسافة …. « أنا مستنياك من الصبح يا أستاذ شبار‏ة – نجوي فؤاد في حد السيف . سحر الباك الإسلامي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s