ليش عم تبكي يا وطن !… لك آخ يا وطن.. آخ يا وطن ..

هي يا شباب مو موعظة ولا خطبة، ولا دليل مستخدم ولا كتالوغ وطن، وما بدي غير رأي حدا لانو كل واحد عندو رأي متمسك فيه بحكم تياسة العقل البشري التاريخية والمتجلية في أطنان التحذيرات على بواكيت الدخان و لا بدي صلح من وراها البلد…

أنا حزين للغاية، ومبسوط للغاية،خايف ومتفائل. زعلان عالدم يللي عمينسفح عالطرقات، مقهور من المحتفلين بالشوارع والناس عمتموت بالصنمين، مطموز من ولاد المسؤولين يللي عميطلعو يسكرو شوارع البلد بسياراتهم الفارهة بدون ادنى احساس بانو هالحركات جزء كبير من المشكلة..

ممغوص من الاعلام السوري يللي لساتو بالعصر الحجري، ومن اعلام الجزيرة والعربية يللي مسمي حالو حر وكلنا منعرف وين مربوط، ومن اعلام الفيسبووك يللي بيحط شي صار وشي ماصار واحيانا شي اسخف من التصديق. وبيهلل لظهور القرضاوي ذو الخطاب الطائفي البشع . زعلان من المؤيدين يللي مقتنعين انو المتظاهرين كلهم خونة ومدسوسين، ومن المعارضين يللي مقتنعين انو كل شي مؤيد هوه خايف او جبان، من قسم المعارضين يللي الو انتماءات عائلية وابعاد اقليمية، ومن قسم الموالين يللي الو منافع ومكتسبات…

خايف على 18 طائفة واعراق مختلفة بتشكل وقود لتسيير اعظم مركبة او وقود لاحراق اكبر بلد. خايف من بعبع اسمو اسرائيل، كل الناس بتعرفو منيح وزعلان من يللي بيحاولو يقزموه من المعارضين ويللي بيحولوه لاصل كل المشاكل من الموالين.,,


وبنفس الوقت فرحان كتير، فرحان لانو لاول مرة بينحكى عن قانون الطوارئ ولو كانت دراسة، فرحان لانو الناس عمتطلع تعبر عن المها وتعبها، فرحان لاني اول مرة بتناقش مع اهلي بالسياسة وكل واحد منا برأي ومؤمن بمخاوف التاني وبآمالو. فرحان لانو الله لما خلق البشرية خلق لكم من انفسكم ازواجاً ، وهلق صار عندكم من مواطنيكم ازواجاً ، مع وضد.


وبالآخر انا متفائل انو هالزواج بين طرفي الشعب رح يولد وطن اكثر صحة وعافية وليس طلاقاً ابدياً .

ملاحظة : صرلي ساعة متردد بنشر هذه الرسالة لاني بعرف مقدار القفلة المخزون عند حضراتكن وانو رح استقبل اطنان من التعليقات الساخرة من نمرة: الكريك السياسي .. يا زلمة شو هالرومانسية، حسيتك كاساندرا . بس يللا .. لنبق هالبحصة

“” تمت “”

منقول من إحدى صفحات الفيسبوك .. مع انه ليس من عادتي النسخ واللصق في مدونتي .. إلا أنها كلمات عامية أعجبتني ..

وزدت عليها ..

جرعة زائدة ..

كل واحد عم يغني على ليلو وصارت هالأيام التجارة بدم الشهداء مربحة.. لا عاد حدا احترم نظام السير ولا حدا عم يلتزم بالقانون والبناء بأراضي المخالفات وشوفو الأساطيح يلي عم تطلع والمحلات يلي عم تتمدمد واسعار التجار صارت بالسما وحتى الخضرجي رفع سعر الكوسا لحالو… وتهريب المازوت وتجارة سلاح

تحمل يا وطن شعارات وخطابات ومؤيدين ومعارضين وتنظير وتحليل وتركيب و كذب وأكل هوا…
الناس يلي ماتت إلها حرمة والدم يلي سال مالو رخيص.

شهداءنا ما ماتو كرمال هيك.. شهداءنا دمون أغلى…

المجد والخلود للشهداء .. عشتم وعاشت سورية

مواضيع ذات صلة :

رسالة إلى كل من يريد التظاهر غداً .. في جمعة الخير لسورية

جرعة زائدة على الفيسبوك ..


Advertisements

3 responses to “ليش عم تبكي يا وطن !… لك آخ يا وطن.. آخ يا وطن ..

  1. ماهر ..انا مابدي نظر ..بس عنجد نحنا علينا دور كتير كبير
    لما منوحد كلمتنا ومنقول بدنا سوريا للكل ..ضد الأصوات الانتهازية الي عم تحاول تستغل هالثورة الشريفة كرمال مصالح ضيقة وكرمال يطبقوا اجندات خاصة ..إنو بيطلعك واحد بيحكي بطريقة التعالي إلي قرفنا منا باسم الإسلام ..
    مهما حاولوا نحنا هون ..مارح نخليهن يرجعوا يصلبوا الوطن

  2. ماهر ..انا مابدي نظر ….بس عنجد نحنا علينا دور كتير كبير
    لما منوحد كلمتنا ومنقول بدنا سوريا للكل ..ضد الأصوات الانتهازية الي عم تحاول تستغل هالثورة الشريفة كرمال مصالح ضيقة وكرمال يطبقوا اجندات خاصة ..إنو بيطلعك واحد بيحكي بطريقة التعالي إلي قرفنا منا باسم الإسلام ..
    مهما حاولوا نحنا هون ..مارح نخليهن يرجعوا يصلبوا الوطن

  3. فعلا شي مؤلم ومبكي وفعلا آآآآخ يا وطن 😦
    وطنا عم يوجعنا ولسا كل واحد مصر على رأيه وشو ما حكى الواحد بيطلع مو خالص 😦

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s