طقوس دراسية … صارت من الذكريات ..

طقوس دراسية … صارت من الذكريات ..

( سامحوني حابب اكتب بالعامية هالمرة )

كتير كان يسألوني رفقاتي , كيف بتدرس , أو شو هية طريقة الدراسة .. بس انا دائما كنت استحي جاوبهن لأنو طريقتي يمكن تكون غريبة كتير شوي..

كل واحد فينا إلو عادت دراسية معينة , وكل واحد فينا بيعمل الجو الدراسي يلي بناسبو , وانا كمان إلي كتير عادات وطقوس غريبة وقت ادرس وأيام الامتحان , رح عدد بعضها بطريقة عشوائية J ..

  1. عاري الصدر : بتصدف انو امتحاناتنا الأخيرة بتجي بالصيف , فطبيعي كون لابس أواعي خفيفة , بس النهفة انو انا حتى لو كانت بالشتي متل امتحاناتنا النصفية متعود وقت ادرس شي فقرة صعبة اشلح قميصي وضل عاري الصدر وبشلح من إجري وبحب ادرس وانا حافي , ما بعرف شو السبب بس هيك بحس حالي حر أكتر قال يعني ومافي شي طابق على صدري ! تخيل يرعاك الله
  2. 2.      الفوضى : هلأ شي طبيعي اني ادرس بأوضة الضيوف كونها الأوضة الأكبر ببيتنا وبعيدة عن الكثافة السكانية بباقي غرف البيت , بس الشي يلي مو طبيعي انو ما بعرف إدرس إلا إذا كانت الأوضة منكوتة ومكركبة , وانا ببحت كل غراضي عالأرض وبحط كل مادة تحت كنابية من الكنبايات , ما بعرف بس هيك بحس حالي مسيطر عالوضع والمنهاج كلو تحت عيني !
  3. المشي : يمكن هي الشغلة بشترك فيها مع كتير طلاب , انو بحب ادرس عالماشي , بس بشرط انو قراءة الفقرة بالمرة الأولى بتكون من جلوس وبتكون كمان بهدوء شديد وبقراها بعيوني وبقسم الفقرة لفقرات وعناوين فرعية وبعدين بشغل هالمحرك وببلش افتل بهالأوضة.
  4. الأكل ليلاً : يعني تقريباً بين الساعة 2 والساعة 3 بتجيني نوبة جوع فظيعة , حتى لو كنت متعشي الساعة 12 .. هيك بدب فيي الجوع بفرد مرة وبصير جاية عبالي اكل أي شي , وبمجرد ما اكل بنعس وبمجرد ما بنعس ببساطة .. بنام L ( ملاحظة هامة ديما نقولا شريكتي الرسمية بهي العادة وياما مقضيين سهرات عالماسنجر ونحنا عم نجاكر بعض بشو عم ناكل هع )
  5. 5.      طق الحنك عالموبايل وإرسال الرسائل : بصير بحب كتير احكي عالموبايل مع رفقاتي ..  يعني بالعادة بقعد معهن ومنتصفن ببعض ما منلاقي سيرة نحكي فيها , بس بوقت الامتحانات مستعد دق لصديقي حتى خبرو يشوف مارسيل غانم مثلا أو حاكي صديقتي لخبرها انو بدي نام .. أو أي تفصيل صغير ممكن ضيع فيه وقت , طبعا كلو بكفة والمسجات بكفة يعني بدون مبالغة ببعتلي شي 500 مسج بشهر الامتحان لاتسلى وشوف شو بدو يجيني الرد هع J
  6. 6.      تقليب الصفحات ووضع البرامج : أكتر تلت شغلات بساويها بالامتحان هنن الأكل والنوم ووضع برامج الدراسة , كل يوم بعد كم صفحة باقيلي أو بالأحرى كم صفحة درست من المادة وبحسب عدد الأيام وبحط برامج للدراسة وطبعا كلللللللو حبر على ورق , يا ريت بدرس على أد ما بقضي وقت وانا عم عد كم صفحة درست !
  7. القريحة الشعرية : ما بينزل عليي الوحي وما بيحلالي اكتب شعر إلا قبل الامتحان بليلة وخود بقا على قصائد على الكتاب أو النوطة يلي عم ادرس فيها , والله يعينو يلي بدو ياخدها بعدي رح يلاقيها مليانة قلوب وغرام وشعر ومن هدول الحراكيش .
  8. إبداعات الصبح : وقت كون عم ادرس احيانا بسهر لوش الصبح , بس بعد الساعة 5 أو 6 بفصل بشكل نظامي , وبصير بيطلع معي إبداع من اللاوعي , مثلا ممكن شعل محارم أو طق فتيش أو ارسم عالطاولة أو امشي عالكنبايات بدال الأرض أو صير اتسائل على اخي الصغير وهو نايم وحط المحرمة بأنفو.
  9. الشرود الذهني والوقوف والتخطيط للمستقبل : كل الأفكار بتجي عبالك وانت عم تدرس وبصير بتخيل شو ممكن صير بس اكبر وايمتا بدي اتزوج ووين بدي اسكن ووين بدي اعمل شهر العسل وآخر شي بيوصل فيي التفكير على كندا واني رح طلق مرتي وبكون لساني قاعد بمساكن برزة جنب المروحة عم ادرس.
  10. هيجان عاطفي : بضل طول السنة ملل وطقيق , وبشهر الامتحان بتزبط معي عاطفياً وعود بقا على مشاوير ومسجات وحراكيش الحب وانت عندك دراسة !
  11. التاريخ والتلوين والبسملة : في عندي عادة اني بحط تاريخ النهار براس كل صفحة , وبلون الفقرات العريضة بالأخضر والفقرات الفرعية بالأصفر  , وبكتب بسم الله الرحمن الرحيم بأول كل مادة مشان الله يوفقني فيها J
  12. الحظ مع المسلسلات :   يعني طول السنة بضلو بحطولنا مسلسلات بايخة بس وقت يجي الامتحان بينزل كل مسلسل أحلى من التاني , تقول يا زلمة في مؤامرة ضدنا ؟؟ يعني بس هيك على سبيل المثال الامتحان الماضي كان عم ينعرض يوميات مدير عام , أي يحرق اختها ما احلاها معقول اتركها واقعد ادرس مثلا ؟؟؟؟
    هي الفقرة برعاية لميس الجاسم لأنو ما بتحسن تشوف مسلسل وتضل قاعدة عم تدرس هي التانية .
  13. 13.  ليلة الامتحان : ليلة الامتحان إلها طقوس خاصة بتبتلش الساعة 12 بركوة القهوة رقم واحد وحبتين بانادول وكاسة شاي , وبالنص في عندي حمام مشان ضل مصحصح , وبعد صلاة الصبح ببلش جهز أواعيي وغراضي , بنام شي نص ساعة بعدين وبرجع بفيق لكمل دراسة وهييييييك لحتى يجي وقت الامتحان.

ملاحظة : بهي الليلة بكون معصب كتير وما حدا بيسترجي يحكي معي والله يعينو يلي بتطلع الشغلة براسو.. .

  1. 14.  بترك شي للمراجعة:  مع اني بحياتي ما لحقت مادة عالآخر , بس ما بعرف فيي عادة انو دائما اترك شي ادرسو الصبح وانا رايح عالجامعة , يعني شي فقرتين تلاتة بنكش فيهن سناني بالتكسي وعلى فكرة معظم المرات بيجيني من هدول فقرات التاكسي ومدري كيف بتذكرهن.
  2. 15.  حمى الفيسبوك : هاد مرض مشترك كمان بين كل الطلاب يلي بيتضاعف نشاطهن الفيسبوكي أيام الامتحانات وبصير الطالب بحط حالتو النفسية أول بأول , وأكيد لازم يتابع كل التعليقات ويرد عليها , مي حلوة يعني بحقو ما يرد عالناس.
  3. 16.  صهريج المي : يعني ما بكفي عم اكل ونام طول الوقت , لأ وبصير بشرب متل الفيل ولحق يا ابو المهر عالحمام رايح جاية , وبعد ما اطلع من الحمام بشغل التلفزيون بسسسس لشوف الموجز طبعا بتروح نص ساعة زمان وبفتح الفيسبوك من الموبايل بسسسس لشو فمين عمل لايك , طبعا بتروح ساعتين زمان كمان.
  4. 17.  بزيد وزني L : ما بكفي ما عم ندرس وعم ناكل هوا , لأ ووزني كمان بدو يزيد وبعد كل امتحان عندي ريجيم مرتب متل ما عم ساوي هلأ :S

 

 

مممم في شغلات تانية بضل بساويها ايام الامتحان بس هدول الشغلات يلي تذكرتهن ويمكن ضيف عليهن بعدين .. بس وهلأ حاسس اني رح اشتاق لهي الطقوس .. عنجد مالي عرفان شو قول وكيف مرقت هالأربع سنين بكلية الإعلام متل لمح البصر , بس كل شي بالحياة إلو وقت وكل شي  بوقتو حلو , وهي الجامعة خلصت ويمكن هلأ بلش الجد ..

اضغط عالصورة لرؤيتها بالحجم الطبيعي – طلاب كلية الإعلام السنة الرابعة -2011

بكل الأحوال حابب قول كل عام وكل رفقاتي بخير وانشا الله كلهم موفقين بالحياة العملية ..

 

 

الجمعة 30 تموز 2011

ماهر المونس .

.

.

مواضيع ذات صلة :

مغص جامعي..

.

.

جرعة زائدة على الفيسبوك ..

http://www.facebook.com/mahermon.wordpress

صفحة المدونة على الفيسبوك

Advertisements

3 responses to “طقوس دراسية … صارت من الذكريات ..

  1. هلأ في نقاط اشتراك بطقوس الدراسة بيناتنا بس أنا بعكسك بينقص وزني بدل مايزيد……
    كتير حلوة حياتك بفترة الجامعة ونشالله بتكون أحلى بعدها…
    يعني وأنا مو متجاكرة كتير منك ، كلها سنة وبخلص

  2. كتير شغلات مشتركة بين كل الطلاب وبنفس هالروح المرحة …
    رغم انو ماني طايقة حالي وجو الدراسة بس انتعشت بعد هالتدوينة وصار عندي دافع قوم ادرس وارجع اسهر متل ايام السنة الاولى وخلصلي كم مادة

    بالصميم ماهر
    تحياتي لابداعك 🙂

  3. ذكرياتنا يلي رافقتنا أربع سنين مارح نقدر ننساها بحياتنا وخاصةً إذا كانت كتير خاصة ومميزة انشاءلله بتكون كل مراحل حياتك الجاية مميزة موفق

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s